CHASA - The National Confederation of Hunters Associations of South Africa

Ons staan aan die begin van ‘n nuwe jaar en dit is daarom miskien goed om net weer die bestaansreg van jagtersverenigings onder die vergrootglas te plaas. Die vraag wat ons moet aanspreek is wat jagtersverenigings vir die individuele lid beteken. Gaan dit oor die reg om vuurwapens te besit? Gaan dit oor opleiding? Gaan dit oor jaggeleenthede wat die vereniging beding? Gaan dit oor skietdae wat aangebied word? Gaan dit oor erkenning aan lede deur toekennings wat gemaak word? Gaan dit oor jagklub vergaderings waar relevante onderwerpe bespreek word en die sosiale interaksie wat daarmee saamgaan? Sekerlik is die bostaande tot ‘n mindere of meerdere mate waar vir lede, afhangende van belangstelling en behoeftes. Maar is dit al waaroor dit gaan?

Die vraag wat ek graag wil vra is of ons altyd die groter prentjie sien en verstaan. In hierdie prentjie is dit nie altyd moontlik om die waarde van dit wat gedoen word tasbaar vir die lid beskikbaar te stel nie. Hierdie prentjie gaan oor die werk wat gedoen word om die toekoms van jag te verseker. Hier gaan dit oor baie ure en baie geld wat belê word om meningsvormers en beleidmakers te beïnvloed. Hier gaan dit oor die onbaatsugtige diens wat u verteenwoordigers lewer om seker te maak dat die nageslag ook die reg sal hê om die Skepping te geniet soos wat ons dit geniet. Elkeen van die aktiwiteite waarby jagtersverenigings betrokke is waarna in die eerste paragraaf verwys word, is belangrike boustene om die toekoms van jag te verseker. Sekerlik moet ons wapens hê, Ons kan nie werklik doeltreffend en eties jag sonder die nodige kennis en vaardighede wat deur opleiding aan ons oorgedra word nie. Dit is ook waar dat byeenkomste en sosiale interaksie nodig en lekker is. Ons moet egter verstaan dat dit alleen nie die wa deur die drif sal trek nie.

Alhoewel daar geen twyfel is oor die bestaanreg van jag nie, moet nie die teenstanders onderskat nie. Die minder sigbare gedeelte van die werk wat u vereniging doen, vind op twee vlakke plaas. CHASA vervul nasionaal ‘n rol om wetgewing en beleid te beïnvloed. Daar verteenwoordig ons (tesame met SA Jagters) die jagters van Suid Afrika. Op die forums wat geskep is, word die saak van jag gestel en word daar gewerk om die gunstigste moontlike wetlike en beleidsraamwerk vir jag te beding. Alhoewel ons dit nie direk kan verdiskonteer aan individuele lede nie, moet elke lid besef dat hierdie insette nog meer belangrik is as die direkte voordele wat lede verkry uit hul lidmaatskap.

Die tweede vlak waarop CHASA werk, is die daarstelling van ‘n internasionale magsblok van jagters. Bande word opgebou met internasionale jagtersorganisasies met die doel om nie net nasionaal nie, maar ook internasionaal strukture in plek te plaas om die toekoms van jag te verseker. Afrika in die algemeen en Suid Afrika spesifiek is ‘n gewilde bestemming vir oorsese jagters. Dit is daarom belagrik vir die internasionale jaggemeenskap om insette te lewer om Afrika en Suid Afrika vriendelike jagbestemmings te maak. U vereniging is deel van die proses om internasionale ondersteuning vir jag in Suid Afika te verseker.

Wanneer u dus wonder oor die voordele om aan ‘n jagtersvereniging te behoort, kyk ook na die groter prentjie. Hoe meer lede ons het, hoe sterker is ons stem en hoe groter is ons hulpbronbasis om u te verteenwoordig.